يااااااااااااااااااااأس
كل اللى بفكر فيه دلوقتى زى ما كان بيقول هانى رمزى فى وجهه نظر " مفيش فايده..مفيش فايده..مفيش فايده "
العلمانيين بطلوا علمنه و الليبراليين بطلوا لبرله
الاخوان طلعوا مقفلين و مبيقبلوش الاخوان اللى من اب تاني
السلفيين طلعوا نادر بكار بس .. الباقى لا يمثل ولا يغنى حتى
مجلس الشعب ناقصه شويه " حب العزيز " و يبقى مولد المطراوى ... من اول دراويش المولد و بتوع البمب و النشان و الحراميه لحد تحط اللمبه على صدرها تنور
و بمناسبه انى كنت بفكر فى المولد افتكرت ان وانا صغير كنت فاكر ان حدود الدنيا شارع المطراوى ... يعنى مفيش بعديه حاجه ... الارض بتخلص بأنتهاء شارع المطراوى وبعديه عدم
مش عارف دى سذاجه ولا براءه بس اللى انا متأكد منه انى فى كلتا الحالتين كنت عيل
بس مش معقول بقى عندى ٢٦ سنه و لسه عيل ... مش معقول لسه عندى نفس السذاجه او البراءه اللى افترضت ان زى ما الدنيا تنتهى بأنتهاء شارع المطراوى فأن الفساد ينتهى بأنتهاء مبارك
تعالوا كده نتخيل شويه اقفاص فيها تين برشومى ... لو فى قفص منهم فيه تين خربان و كلهم مع بعض فى قوضه واحده مش بقيت الاقفاص هتخرب .. لو مش دلوقتى يبقى بكره او بعد اسبوع او بعد ٣٠ سنه.
و الاقفاص الفاسده بتحسد السليمه ... اشمعنى القفص ده نضيف و بيلمع و جواه تين برشومى لسه ببرشامته
لازم نفك برشامه البرشومى عشان يخرب هوا كمان و نبقى كلنا فى الهوا سوا.
و بهذه الاراده و الفكر البرشومى ينتشر الفساد بين الاقفاص ... ومبارك لم يكن الا قفص .. يمكن هو القفص الكبير او القفص اللى على الوش بس فى الاول و فى الاخر قفص ... ناس كتير قالت ان مبارك فى اول ايامه كان مبشر بالخير و محترم و الفساد طاله و فك برشامته.
الفساد من الشر ... الشر هو غياب الخير ... طب الفساد يطلع ايه بقى ؟؟؟؟؟
الفسادُ: نقيض الصلاح، فَسَدَ يَفْسُدُ ويَفْسِدُ وفَسُدَ فَساداً وفُسُوداً، فهو فاسدٌ وفَسِيدٌ فيهما، ولا يقال انْفَسَد وأَفْسَدْتُه أَنا.
دى من المعجم بقى و بيقولك كمان مفيش حاجه اسمها انفسد ... يعنى لازم الفساد يبقى منقول من المفسد"بكسر السين" للمفسد "بفتح السين".
طب لما القفص الفاسد يلاقى نفسه مرفوض و الناس مش عايزاه مش هيضحى بنفسه يعنى عشان خاطر البشر لكن بذكاءه البرشومى هيحاول يقنع الناس بأنه مشى بأنه يقدملهم اقفاص تانيه فاسده و ان كانت فى ظاهرها الصلاح.
يعنى من الاخر هيغير وش القفص ... يحطلك حبه حلوين على الوش عشان انتا زى اى خروف تفتكر ان القفص ده درجه اولى و تشترى ...
و علامات القفص الصالح معروفه ... انتا اكيد مش هتشك فى قفص بدقن و زبيبه ... لو شككت فيه تبقى بتشكك فى العقيده البرشوميه ... تبقى انتا مش برشومى مخلص ... مش برشومى ببرشامته.
يعنى من الاخر كده احنا انضحك علينا ... الفساد موجود من ايام قابيل و هابيل ... الفساد زى العفن بينموا فى البيئه الرطبه قليله الاضاءه يعنى مفيش شفافيه و فى نفاق و لحس جزم
الفكره ان عصر مبارك كان عصر توافرت فيه البيئه المناسبه لنمو العفن ده ... مفيش شفافيه فى الدوله البوليسيه اللى اتأسست من ايام عبد الناصر ولا فى دوله داهيه زى السادات ... الكل كان متعود على لحس الجزم من ايام الملك او يمكن دى ثقافه من قبل كده
فى جيل اتربى على كده ... على ان مفيش شفافيه و ان للحفاظ على البقاء لازم تلحس الجذمه اللى على رقبتك
و البيئه دى خلت العفن يعشش فى كل حته ... مفيش يوم بيعدى منغير ارتكاب جريمه عفنه او مشاهدتها و السكوت عليها
والفساد بقى زى اللبلاب من قمه الهرم لقاعدته ... بقى عادى و مش عيب .. بقى مقوم من مقومات البقاء
الفساد متمثل فى كل اصحاب المصالح اللى بيفكروا فى مصالحهم قبل مصلحه البلد
عشان كده دوله التحرير الطاهره الصالحه كانت بالنسبالهم بيت الرعب ... التحرير هتبقى الايد اللى هتنقى الاقفاص البايظه و ترميها فى الزباله ... و الاقفاص اللى فيها و فيها هتنقى الخربان فيها و ترميه ... التحرير هتطهر المجتمع البرشومى و مش هيفضل غير كل برشومى سليم و صالح بجد.
احنا مش بنحارب مبارك ولا مجلس عسكر .... احنا بنحارب فساد
فساد بيحاول بكل حيله و ذكاء ان يبقى على قيد الحياه ... بيحاول يفسد كل صالح و يشوه مفاهيم الصلاح
اللى بيفكر ان حتى لما ييجى ريس ولا يمشى العسكر الحرب هتخلص
الحرب دلوقتى بره الاشخاص ... الحرب حرب عدديه ... هنقدر نحافظ و ننضف اد ايه و الفساد هيقدر يبوظ و يعطل اد ايه
بس فى الاخر الفساد هيختفى لسبب بسيط ... البيئه مبقتش مناسبه خلاص ... النور ملا الدنيا.
الى كل برشومى حق خليك ببرشامتك.
