صحيت من النوم لقيت مبقاش في مجلس شعب و بقي في قانون الضبطيه القضائيه ووجود شفيق بقي دستوري
قلت احييييييييييييييييييييييييه وقت لا تنفع الاحيه.
كانوا بيقولولنا استنوا لحد شهر ٦ و كله هيبان و بانت ...
النظام برئ و الثوار غلطوا انهم نزلوا الشارع و خدوا جزائهم،الراجل العجوز قطع الكوره و رش دم و قالهم العبوا بعيد
الاخوان كانوا نسخه تجريبيه اثبتت فشلها و تم سحبها من السوق،
و عشان الجيش يرجع سكناته لازم يسيب الشعب وهوا مطمن عليه فانتخبلوا شفيق .
طب سوال بقي هيه الثوره فشلت ؟؟؟؟؟؟؟
هوا في ثوره بتفشل يا جدعان !!!!
الثوره هيا "اجماع" شعبي علي رفض "الوضع" الحالي و المطالبه بوضع جديد، الشعب تعب يا جدعان و عايز يغير الوضع .. ماهي لو مش بالتراضي يبقي "اغتصاب" للسلطه.
طب الناس نزلت الشارع عشان "عيش .. حريه .. عداله اجتماعيه"
و ده طلب اي ست بيت عاديه ... الراجل اللي هيحكمها لازم يجيب العيش و يسيبها تروح تشوف امها و يحسسها بآنوثتها و الا زي ما دخلنا بالمعروف نخرج بالمعروف .
لما مبقاش فيها معروف قالت نحتكم للقضاء ... واهو ادينا اتطلبنا في بيت الطاعه.
طاعه ايه و الجوازه باطله
جواز عتريس من فؤاده باطل
مفيش حاجه اسمها نسمع الكلام و بلاها سوسو وخد ناديه.
اللي موافق انه يختار ما بين مرسي او شفيق يبقي مش فاهم الثوره دي قامت ليه،
الثوره ذي الاستيكه ... الثوره نقطه و من اول السطر.
انزل انتخب مين يا جدعان ... احنا عملنا ثوره مش سلطانيه بليله.
كل اللي نزل قال الشعب يريد اسقاط النظام كان ضد الفساد والخيانه
يبقي مينفعش تقوله ينزل ينتخب ما بين الاتنين.
جواز عتريس من فؤاده باطل
شرعيه الصندوق ليها معايير ... الاشهار و القبول
مرسي و مكتب الارشاد بيلعبوا من ورانا لمصلحه الجماعه ... يعني مفيش اشهار
شفيق و المجلس العسكري بقي لا اشهار ولا قبول
اللي هينتخب حد من الاتنين يبقي بيشهد علي عقد جواز بالزنا
انا مش هسيب حد فيهم يزني بمصر
جواز عتريس من فؤاده باطل
ده الكلام اللي كان نفسي اكتبه قبل ما اروح انام
لما صحيت من النوم و لقيتنا مطلوبين في بيت الطاعه و بعد مرحله الاحييييييييه ... ضربت السيفون و غسلت و شي
وفكرت
ما بني علي باطل فهو باطل
احكموا باللي انتوا عايزينه فأحكامكم لا تعنيني ... جواز عتريس من فؤاده باطل
رشحوا اللي عايزين ترشحوه ... جواز عتريس من فؤاده باطل
خوازيقكم و عصيانكم و سجونكم لا ترهبني ... جواز عتريس من فؤاده باطل
الشعب يريد اسقاط النظام ... الثوره مستمره
