فى العيد مش هلبس بدله ظابط ... هلبس سوتيان ازرق

بعد ما شفت الفيديو بتاع البنت و هيا بتتسحل و تنطحن و تتعرى ... شفته اكتر من مره و عييط كل مره ... و هعيط لو شفته تانى ... هعيط عشان راجل.

كان فى كام سؤال  لفوا فى دماغى و قلت اسأل؟

ايه المفروض يكون رد الفعل الطبيعى للوحشيه دى ... مين اللى المفروض يكون ليه رد فعل اصلا!!!

الموقف ده بيمس كل شعب مصر قيادات و احزاب و جيش و شرطه و ثوار و سياسيين و مغيبين و اى بنى ادم على وجه الارض  

طب الناس دى كلها المفروض رد فعلها الطبيعى يبقى ايه!!!

اصل الموضوع مش بنت و اتفرمت ... دى رساله واضحه زى الشمس

مفيش شرف ... اشرف من فيكم هنهتك عرضه ... واللى هيدافع عنه هنفشخه ... واللى هيفكر ينقذهم قبل ما نرميهم فى الزباله هنطلع تلاته دين امه.

يعنى من الاخر ... لازم نكون شعب مخصى ... و نعيش راسنا فى التراب و مؤخراتنا لفوق عشان لو البهوات حبوا يتسلوا يلاقوا حاجه يلعبوا فيها.

و بعدين نبقى عاملين زى قصه البلطجى اللى اغتصب كل ستات الشارع ... الراجل اللى بيعترض يقتله ... فعاشوا كل الرجاله اللى مبتعترضش لما يشوفوا ستاتهم بتغتصب ... و محدش فيهم كان مكسوف ... هنتكسف من ايه بقى ... كلنا شرفنا ملطوط.

نرجع لرد الفعل الطبيعى

كنت متوقع بعد اللى حصل الاقى كل راجل مصري عنده ذره رجوله فى الشارع

دى الحاجه الوحيده اللى  تثبت ان لسه فى نخوه مش مهلبيه.

كنت متوقع اضرابات من عساكر و ظباط الجيش الشرفا اللى ميرضوش باللى حصل لامهاتهم و اخواتهم

دى الحاجه الوحيده اللى تثبت ولائكم للوطن مش للبياده. 

كنت متوقع الاقى كل القوى السياسيه و الاحزاب و مرشحين الرئاسه بتوقف اى نشاط او تعاون مع المجلس العسكرى لحد ما نشوف كل اللى شارك فى هتك عرض مصر بيتحاسب

دى الحاجه الوحيده اللى تثبت حب الوطن مش الكرسى.

كنت متوقع الجيش يقدم اعتذار رسمى و يعلن عن اسماء القيادات و العساكر اللى شاركوا فى الجريمه دى و يعفيهم من الزى العسكرى  و يقدمهم للمحاكمه 

لان الحاجه الوحيده اللى كانت هتثبت ان عندكوا شرف العسكريه مش بس عملاء و فاسدين.

بس للأسف كل ده محصلش 

و المجلس حافظ على موقفه المشين من بدايه الثوره .

و زى ما بيقولوا فى الجواز .. السكوت علامه الرضا .. فأتمنى للشعب المصرى ليله دخله سعيده .. و الله الموفق.

رساله اخيره:

الى كل راجل مصرى لسه عنده ذره نخوه ... عسكرى بقى ولا مدنى ... اوعى تقبل انهم يخصوك ......

مات الكلام