انا كنت ضد كل اللي قالو ان لو البرادعي هيقلع امك الحجاب و ابو اسماعيل هيلبسها في الحيطه او كما قالو، لكن عمر سليمان ملوش دعوه بامك .
يا ساده عمر سليمان كان هيعمل حاجات كتييير في امك ... علي سبيل المثال لا الحصر، الباشا يقدر يطلع تلاته ميتين امك ، و هوا عارف يطلعهم منين، قبر العيله مش سر حربي " و لو حتي سر حربي ".
وبعدين دايما بيقولك لو القبر اتفتح لازم يدخله تلاته ، فمبالك بقي لو البكابورت اتفتح ، عمرو موسي و شفيق مش كفايه عشان يسلكوه ، لازم حد نظره ثاقب ، يضرب بعينه في البكابورت يجيب اخره، و هوا الحقيقه جاب اخرنا كلنا.
عمر سليمان كان القشه اللي قسمت ضهر الحمار، لان الحمار كان فاكرنا كلنا خرفان ، اول ما يطلعلنا الديب هنجري في كل حته .. علاقه غريبه تتكر من حمار الي حمار و من ديب الي اخر، بس سياده الحمار .. الديب بتاعك مش اصيع من اللي قبله.
متستغربوش ان عمر سليمان كان طالع بمشهدين، الاولاني بيقولك مش هترشح و التاني بيقولك هترشح عشان ال ١٨ واحد اللي ضغطوا عليا، حط نفسك مكانه و شيل ١٨ (واحد) مش كده و بس خليهم كلهم يضغطوا، ترشح نفسك ولا تطرشق من الضغط ،"علي فكره صدفه ان المجلس العسكري مكون من ١٨ (عضو) دي صدفه قذره يسأل فيها خيالك المريض"
بس والله كتر خيره ، بدل ما بيحكم مصر من وراكوا كان عايز يدخل البيت من بابه و يحسسكوا انكوا ليكوا كلمه، بس نقول ايه مالكمش في الطيب نصيب و هوا كده كده ماشي معاها برضه.
نرجع بقي لابو سوسو اللي احنا لسه ما روحنالوش اصلا، انا لقيت كل واحد عمال يدلو بدلوه في موضوع ابو اسماعيل ده قلت اروح اجيب الجردل بتاعي من علي الشط انا كمان ... انا بصراحه مش فاهم اي حاجه من موضوع الادله و البراهين ده ، و معرفتي بالسياسه لا تزيد عن معلومات الواد مزيكا في المتزوجون ... بس انا بحب المنطق ، بالمنطق كده انا راجل محامي بقالي خشروميت سنه، و رايح اترشح رئيس جمهوريه، و وافقت علي التعديلات الدستوريه و قلت ان اللي مش هيوافق هيبقي من الذئاب "سؤال برئ نط في راسي : هل ده معناه ان اللي وافق هيبقي من الحمير !!! " ، و كنت عارف كويس ان التعديلات دي بتقول ان اللي هيرشح نفسه لازم يسأل امه الاول ، يا حااااجه ... جنسيتك ايه؟
بالمنطق يعني كنت وفرت اليفط دي كلها و قبل ما تترشح خليت معاك ورقه واضحه وصريحه بتقول انها مصريه ميه في الميه ... اذا كان عملوها في البرادعي اللي امه عمرها ما سافرت و كان لسه مترشحش اصلا، يبقي هيعدولك ان الحاجه معاها جرين كارت و اختك معاها الجنسيه و عايشه هناك اصلا، هتقولي البينه علي من ادعي و ده ياخدنا لمن ادعي بقي...
طيب هوا من ادعي ده هيغلب ... لو عايز يلبسهالك كان لبسهالك ... فيديو حلف اليمين يتفبرك في مدينه الانتاج، شهاده الداخليه تقول انها معاها الجنسيه الامريكيه و لفافه بانجو هديه ، و القاضي يقولك الباسبور الامريكي سليم و متعملوش كشف عذريه ، بالمنطق كده لما دولتين يقرروا يزورا بكل امكانياتهم خوفا من فارس الشريعه اللي هيقضي علي احلام اوباما، يبقي هيعرفوا يزورا ورقتين ... بس المنطق برضه بيقول انك لو معاك طبق كشري وانا سرقت منه معلقه مش هتحس بيها،لكن لو جيت غرقت الطبق شطه مش هتاكله ، فا هما عايزين يخلو الكشري في صفك بدل ما يروح لحد تاني، لو افترضنا يعني ان في مليون واحد هما دول القوه التصويتيه لاولاد ابو اسماعيل ... لما الموضوع يتحل تاني يوم و يتم اثبات ان ابو اسماعيل امه ضحكت عليه و خدت الجنسيه بدون علمه و يقطعوا الشورت في البيسين ... المليون ابو اسماعيني دول هيبقوا مليون ابو الفتوحي ولا ابو تريكي حته ... الفكره كلها انهم يسيبوا ابو اسماعيل بطل في عين كل اولاده عشان يفضلوا يناصروه و ميروحوش لحد تاني يرجحوا كفته ... هذا رأي العبد لله و ملوش اي اساس من الصحه.
سبحان الله وانا بكتب البتاعه دي ربنا بعت في طريقي رد اللجنه العليا للانتخابات في ملف مخصوص
انا مش هكتب حاجه عن الجمعه المباركه دي ... قوم اجهز بالخميره و الماسك و العلم و علي التحرير مع اول نور للشمس او خد مكروباص رمسيس وقتي و متستناش المترو لما يفتح دا المشي تحت كوبري الجلاء يفتح النفس ... اما بالنسبه لاخواننا المطاريد اللي زييي ... في مظاهرات هتطلع لمسانده الثوره في كل مدن العالم يوم ٢٠ و ٢١ ... لو انتا جاري في تورنتو تعالي معايا يوم ٢١ في دنداس
والسلام ختام
المقال هذه المرة مدهون بالوجع وطعم المرارة التى نشعر بها جميعا ..لكن ما يدهشنى هو تلك المراوغة فى الكتابة فلا انا أعى انت مع من وضد من ؟ .. هل انت مع المجلس العسكرى ام ضده وهل انت مع التيار الدينى ام ضد ؟ .. انا عن نفسى اصبحت ضد كل ما يحدث وضد كل الصفقات وضد ان تنتظر ان اكتب تعليقا على ما تكتب فى كل مرة دون ان تهتم بالمثل وتضع تعليقا على ما اكتب .. كده كل حاجة خربت واطلع من نافوخى
ReplyDeleteاستاذي العزيز الجامد جدا ... انتا عمرك شفت طالب غلبان بيصحح ورقه امتحان استاذ ... انا يا عم غلبان معرفش اقول غير الف مبروك و عقبال البكاري واللي جبلك يخليلك غير كده انا عبيط
ReplyDeleteموضوع المراره ده بقي يطول ... بس هوا انا من ساعه ما بطلت تدخين ومبقاش عندي مراره ... يمكن عشان كده بتطفح علي طول
الانتماء بقي و التلون ... اظن انا في اخر المقال بدعوا الناس للنزول ضد حكم العسكر و بقول ان رآي الشخصي ضعيف المنطق وصل للحل من قبل اصلا ما اللجنه العليا للانتخابات تنشر الاوراق بتاعت ابو اسماعيل
موضوع بقي ضد الاسلاميين ولا لآ ... فانا مش شايف ان في حاجه اسمها اسلاميين اصلا
اللي قالوا ان شريعه الله منهجهم ... مكنش ليهم دعوه بالشريعه و كل يوم بيحرجوا الدين اللي بيحاولوا ينسبوا تصرفاتهم و اهواءهم الشخصيه ليه ... الموضوع كله انهم مجموعه منظمه تدين بالولاء لبعض القاده اللي معندهمش خبره سياسيه
اللي هيخدم البلد علي عيني و راسي ايا كان انتماءه ايه